Forord
Arbeidet med sogeverket om gardar, bustader og folk på Sula nærmar seg no fullføring. Med dette legg vi fram femte bandet av Sula-soga. Dette er det avsluttande bandet med busetnadssoge. Det står no berre att eit band, registerbandet.Band 5 omfattar området frå og med Stadsneset til og med Kalvestad. I forordet til andre bandet gjorde vi greie for at vi måtte endre planane om fire band til fem. Grunnen var som det stod den gongen at «Ut frå ei samla vurdering av stoffmengda som det etter kvart viser seg vi kjem opp i, og for å oppnå ein jamnare storleik på kvart band, har styret for stiftelsen kome til at verket må aukast til 5 band. Dermed får resten av verket ei noko endra inndeling i høve til det som opphaveleg var tenkt.» Også i arbeidet med band 5 har arbeidsgruppa hatt verdfull hjelp til å identifisere gamle bilete av ei gruppe lokalkjende folk i dei ulike bygdelaga som dette bandet omfattar. Liste over desse kjem i siste bandet, som altså blir eit band med fleire register til dei fem fyrste banda, komplett liste med retting av feil og kjeldeliste.Elles viser vi til forordet i første bandet.