Forord
Med dette ligg andre bandet av Sula-Soga føre. Band 2 omfattar området frå og med Furneset til og med Tranvågen. Etter dei opphavelege planane skulle dette sogeverket kome ut i fire band. Ut frå ei samla vurdering av stoffmengda som det etter kvart viser seg vi kjem opp i, og for å oppnå ein jamnare storleik på kvart band, har styret for stiftelsen kome til at verket må aukast til 5 band. Dermed får resten av verket ei noko endra inndeling i høve til det som opphaveleg var tenkt.
   I arbeidet med band 2 har arbeidsgruppa hatt verdfull hjelp til å identifisere gamle bilete av ei gruppe lokalkjende folk i dei ulike bygdelaga som dette bandet omfattar. Liste over desse kjem i siste bandet.
  Frå og med dette bandet er elles den faggruppa som arbeider med innhaldet i Sulasoga utvida med ein ny bilde-medredaktør, Harald E. Tafjord. Han skal i tillegg arbeide med kart-namn og rammetekstane om stadnamn i samråd med prosjektleiar Arnfinn Kjelland.
  Elles viser vi til forordet i første bandet.