Forord
Jon Kolden vart fødd på Grafferskjørri i Garmo i 1925. Skulegangen hadde han i Garmo og ved Lom og Skjåk realskule. Examen artium tok han på engelsklina ved Eidsvoll landsgymnas i 1946.
Ved universitetet i Oslo tok han bifagseksamen i historie og engelsk – og seinare lærarprøva ved Oslo lærarskule i 1953.
I 2 år var han tilsett ved Lom framhaldsskule før han i 1955 vart tilsett som adjunkt ved Lom og Skjåk Realskule, ei stilling han hadde fram til 1966. Då vart han styrar/rektor ved Lom ungdomsskule, ein skule han bygde opp frå grunnen. Jon Kolden var og sentral i å få gymnasklassar til Lom i 1972, ein skule som vart til Lom vidaregåande skule med han sjølv som rektor frå 1977. Denne stillinga hadde han fram til han tok over som bygdabokskrivar i 1988.
Gjennom heile livet var han politisk engasjert, m a var han ordførar i tida 1972–1975.

Lom kommune ved Bård Hanem

Forord frå bygdaboknemnda
Jon Kolden vart tilsett som bygdabokskrivar for Lom i 1988. Han vart med ein gong eit midtpunkt for alle i bygda med interesse for bygdasoga. Han vart Sogeskrivaren i Lom. Snart fekk han kontaktar både i inn- og utland, og han hjelpte mange til å finne attende til «røtene» sine.
Da han døydde i 1996, låg det etter han ein «råkladd», som han kalla det sjølv, og ei mengd notat. Men storparten av kunnskapen bar han nok med seg sjølv.
Alt frå 1978 hadde det vore ei sogenemnd i Lom. Dei tenkte seg ei ålmenn bygdasoge. Frå 1988 vart det arbeidd med å fullføre ei gards- og ættesoge.
I eit notat datert 30. januar 1996 har Jon Kolden gjeve eit stutt oversyn over arbeid og status. Her ser ein tydeleg at arbeidet vart utført i ei brytnings- og overgangstid. Jon byrja arbeidet med blyant og notat, gjerne på baksida av kommunale papir, og avslutta i ei dataverd i rivande utvikling.
Etter ein del forarbeid gjorde formannskapet i mai 1997 vedtak om at Snøhetta forlag a.s skulle gjera eit forprosjekt for ei gards- og ættesoge for Lom. I juni gjorde formannskapet vedtak om å velja ei bygdaboknemnd. Medlemer har vore Sigmund Garmo, Oddbjørg Blakar, Ole Magnar Hoft, Bård Hanem og Gaute Helland. Frå bind to kjem Olav Svestad inn for Sigmund Garmo som representant for Lom Heimbygdslag. Nemnda fekk fullmakt til å gjera naudsynte avtalar med Snøhetta forlag innafor gjevne økonomiske rammer.
Det har vore ein stor krins av aktive grendemenn og -kvinner med i arbeidet. Asbjørn Dagsgard har vore ein trufast språkkonsulent for nemnda, og Lom Knipsarlag, Per Steinar Løkken og Snøhetta forlag har alle vore gode samarbeidspartnarar.
Nemnda takkar alle for arbeidet og samarbeidet.
Etter at arbeidet med bind 2 er avslutta går Oddbjørg Blakar ut av nemnda.
Kristin Kolden Brandsar har etter nærmare avtale vore engasjert som sekretær på deltid for nemnda frå og med bind 1.
Lom i oktober 2002
Gaute Helland, leiar

Forord frå redaksjonen
Forord frå redaksjonen, sjå bind 1 s. 5–6.