Heimar og folk
Dei nye Herøybøkene, som har fått namnet Heimar og folk, er ei ajourføring av Gardar og folk som kom ut første gongen i 1962/63. Forfattar av Gardar og folk var Bjarne Rabben, og serien vart gitt ut i tre band. Nytt opplag vart trykt i perioden 1979 til 1983. I tillegg til Gardar og folk 1,2 og 3 omfattar heile serien Herøyboka følgjande band: Bygdesoga 1, 2 og 3, Landslag og folkeliv og Ute i krig. 
Gardar og folk er no utselde, men dei andre bøkene er framleis å få kjøpt.
I 2006 utarbeidde Arnfinn Kjelland ved Høgskulen i Volda forprosjektrapporten Ajourføring av Herøyboka. Denne rapporten har vore grunnlaget for det vidare arbeidet med dei nye bøkene. Det vart i rapporten lagt opp til bruk av dataprogrammet BSS (Busetnadssoge), og styret i Herøy Sogelag gjekk inn for å bruke dette programmet. 
Arbeidet med å registrere opplysningar frå Gardar og folk vart gjort 2005/2006. Sommaren og hausten 2006 vart det sendt ut skjema til dei fleste husstandane i kommunen. Etter kvart som svarskjema kom inn, vart opplysningane registrerte i dataprogrammet BSS. Sommaren 2007 starta arbeidet med å kople saman familiemedlemane og knyte desse til dei rette bustadene. 
Rundt 60 grendekontaktar/medhjelparar frå heile kommunen har hjelpt til med å levere ut skjema, få inn manglande opplysningar, dele ut utskrifter av manuset til kontroll-lesing m.m. 
Herøy Sogelag vil takke alle desse for god hjelp i arbeidet! 
Dei einskilde banda i dei nye Herøybøkene inneheld historisk stoff om alle bustadene i  kommunen frå ca 1920 og fram til bøkene vert trykte. Størsteparten av innhaldet er likevel om folket som har budd og bur her. Banda er inndelte i krinsar og vidare i namne- og matrikkelgardar. Det er skrive grendekapittel om kvar krins/bygd og om kvar namne-/matrikkelgard. I bøkene er det også gjort plass til mange bilde og kart.
Det er meininga å gi ut fire band samt eit eige registerband.

Heimar og folk er planlagt i desse banda: 
Band 1: Runde, Remøya og Leinøya (utanom Gjertneset)
Band 2: Indre Herøy (med øyane i Herøyfjorden)
Band 3: Skorpa, Nerlandsøya og Fosnavåg (utafor Skaret)
Band 4: Resten av Fosnavåg by/Bergsøya (med Gjertneset)